Chwilio ffurf

Exodus 2

Moses nni Gargeleg

1Be’ nib mo’on ni yib ko ganong rok Levi e le’engiy be’ ni bpin ni yib ko re ganong nem. 2Me diyen nge gargel ni bochi pagel. Ma fa’ani guy e re pin nem nrib fel’ usun fare tir, me mithag ni dalip e pul.- 3Ma nap’an ndabkiyag ni nge mithag, me fek ba dug nni ngongliy ko ro’uy, nge liyef e pich ngay. Me tay fare tir nga langgin, me tay nga fithik’ e pan nib n’uw ni bay u marichlen e lul’. 4Me par bochi pin ni walagen e re tir nem u orel riy ngi i guy e n’en ni bay rin’.

5Me yib be’ ni bpin ni fak Farao nga p’ening ko re lul’ nem ni nge maluk, me par e pi’in ni ppin ni tapigpig rok ngu u ranod u to’oben e lul’ i yan. Me guy fare dug ni bay u fithik’ e pan, me l’oeg be’ ni bpin ni sib rok nge yan i fek. 6Me chuweg fare pin ni fak Farao e upong u daken fare dug me guy bochi pagel ni bay u langgin, ni be yor. Me runguy, me ga’ar, “Re tir ney e reb fapi bitir rok e Hebrew.” 7Me fith fachi pin ni walagen fare tir fare pin ni fak Farao ni ga’ar ngak, “Dab gu wan gu pining reb e bpin ni Hebrew ni ba’ logowen thuthun nge ayuwegnem ngi i pi’ e thuth ko re tir nir?” 8Me ga’ar, “Mman.” Me yan fachi pin i pining e chitiningin fare tir nge yib. 9Me ga’ar fare pin ni fak Farao ngak, “Mu fek e re tir ney ngu’um chothowliy ni aram gag, ya bay ug pi’ puluwom.” Me fek fare pin fare tir ngi i chothowliy. 10Fa’ani ilal boch fare tir, me fek i yan ngak fare pin ni fak Farao, me tay nike fakay. Me ga’ar, “Gu chuweg u fithik’ e ran,” ma aram me tunguy fithingan ni Moses.”+

Moses ni mil nga Midian

11Ma nap’an ni ilal Moses, me yan i guy e girdi’ rok, ni aram e Hebrew, me guy rogon ni yibe gelnag e thin ngorad yad be rin’ e maruwel nib gel. Me guy be’ u Egypt ni li’ ba Hebrew ngem’, ni reb i girdi’en Moses.- 12Me chachangar, ma fa’ani guy nde moy be’ u rom, me li’ fa’anem nu Egypt ngem’ me ker e yan’ nge mithag nga fithik’. 13Me reb e rran riy me sul, me guy l’agruw e pumo’on ni Hebrew ni yow be cham. Me ga’ar ngak fa’anem ni ir e ba kireb, “Mangfan ni ga be li’ be’ ni girdi’em?” 14Me ga’ar fa’anem, “I mini’ e ke tem ni ngu’um gagiyeg nagmad ma ga be pufthin nagmad? Mog, kam tafinaynag ni ngam li’eg nggum’ ni bod rogon fa’anem nu Egypt ni mu li’?” Me rus Moses, me ga’ar u wan’, “Kenang e girdi’ e tin kug rin’.” 15Fa’ani rung’ag Farao murung’agen, me guy rogon ni nge li’ Moses ngem’, machane me mil Moses rok nge yan i par ko nam nu Midian.

Me reb e rran ni be par Moses u but’ u to’oben ba luwed,- 16me yib medlip e ppin ni fak e prist nu Midian. Marbad ra linged e ran, miyad suguy tafen e ran ni fan ngak e saf nge kaming ni fak e chitamangirad. 17Machane me yib e pi’in yad ma gafaliy e saf nge kaming ra tulufedyad. Me yan Moses i ayuweg fapi ppin, me pi’ e ran ngak e gamanman rorad. 18Fa’anra sulod ngak e chitamangirad i Ruel, me fithrad ni ga’ar, “Mangfan ni kam sulod e daba’ ni gimed ba papey?” 19Miyad fulweg ni lungurad, “Ba’ be’ u Egypt ni ayuwegmad rok e pi’in yad ma gafaliy e gamanman, mus ko ran ni l’ing ngi i pi’ ngak e gamanman romad.”

20Me fith ngak fapi ppin ni fak ni ga’ar, “Bu uw? Mangfan ni kam paged u rom? Marod mu pininged nge yib i un ngodad ko abich.”

21Me turguy Moses u wan’ ni nge par u rom, ma aram e de n’uw nap’an me pi’ Ruel Zipporah ni fak ngak nge le’engiy. 22Me gargeleg bochi pagel. Me ga’ar Moses u wan’, “I gag e gu ba milekag ni gu be par u ba nam ni gathi nam rog, me tunguy fithingan fachi pagel ni fak ni Gershom.”+

23Me munmun me yim’ e pilung nu Egypt. Machane piyu Israel e kuyad be gowol ko gafgow ni yibe tay ngorad ko sib niyad be tay rok piyu Egypt, miyad yornag e ayuw ngalang. Me yan lamrad ngalang ngak Got, 24me rung’ag lamrad ni yad be gowol, me leamnag fare m’ag u thilrad Abraham, Isak nge Jakob.- 25Me guy rogon ni yibe sibnag yu Israel me magfan’ ngorad.

Bible Ni Thothup

© 2007 Bible Society of Micronesia. Released under the Creative Commons CC-BY-SA license 4.0.

More Info | Version Index