Chwilio ffurf

Mark 1

Milidimbayi Yalunya Junwanyi Ngurrunbawarranyi

1Ngayu karungka narrinya nangangi Jisus Krayiskanyi. Ngayu karungka narrinya kunybanyi jangkurranyi nangangi Jisus Krayiskanyi, nyulu jandanyi nangangi Kudkanyi. 2Wabula wankalana yarrijbayi jangkurr najana Kudkanyi nganinyiwanyi. Nangangi niji Yayisaya. Nanda nganinyi, nyuli yanybawarr jangkurranyi Kudkanyi. Yarrijba nyuli nanda jangkurr najana jali karu Kudwanyi. Nayinda barri nanda jangkurr jali yanyba Kud nanganginkanyi jandayngkanyi, “Jangayu manjijba nganinyi waluwa nganyindu, baki janyulu kaya yalungi. Janyulu kaya yalungi nayi barri, ‘Birrirrinja narringkaja kurdulu nangangi. Birrirrinja narringkaja kurdulu.’ 3Nanda nganinyi jalija ngayu manjijba waluwa barri nganyindu, janyulu jungku mangkurruna yajina, baki janyulu kaya yalungi barri, ‘Birrirrinja narringkaja kurdulu, badajbajangangi nanda walkurra mambuka. Janyulu badajba, nanda jalija manjijba Kudwanyi. Birrirrinja narringkaja kurdulu nangangi’.” Barriwa. Nani barri yanybayi nanda jangkurr najana Kudkanyi. Barriwa.

4Jungkuyi nganinyi mangkurruna yajina, nangangi niji Jun Ngurrunbawarr. Nyulili ngurrunba yalunya wabudana. Nyulili babdayis yalunya. Nyulili milidimba yalunya nayi barri, “Ngindu narri muwa narringinkanyi balkinyi yajinyi. Ngindu narri muwa, jungkungangi narrili balki nangangi Kudkanyi, baki janyulu manjamanjamba narringi balki yaji Kudwanyi, baki jangayu ngurrunba narrinya wabudana.” Nani barri nyulili milidimba yalunya. 5Kajamuku yali badajba nangandurri Junyurri, mankunki nangangi jangkurr. Badajba yali kulani nanamunanyi walkurrananyi yajinanyi niji Judiya, baki bayunguna barrawuyabarrawuyananyi niji Jirusalim. Ngindu yali muwa yalunginkanyi balkinyi yajinyi, baki karu yali Jun, yali jungku balki nangangi Kudkanyi. Baki nyuli ngurrunba yalunya wabudana Junwanyi. Nyuli ngurrunba yalunya bundalina, niji Jurdan.

6Nanda barri Jun Ngurrunbawarr, nayi nyulili jungku. Wudumba nyulili nganya nanankanyi yanimalkanyi, niji kamil. Nanda kamil barrinani yarrama. Wudumba nyulili nanda nganya, bakili nyulu yabimba jumbala nangangi nganyayudinyi. Bakili nyulu kijijba waba nanganginyina muwana. Wardamba nangkili ngawamba nyangkunyalinyi baki ngandalanyi. Miku nangkiyanyi wardamba barnyinyi, ngawamba nyangkunyalinyi baki ngandalanyi. 7Karuyi yalunya Junwanyi Ngurrunbawarranyi, “Nanda barri nganinyi jalija nyulu badajba bayngkani ngakindu, nyulu walkurra mambuka ngambalangi. Nyulu mili walkurra mambuka ngaki. Nyulu ngiruka, ngala miku ngayu ngiruka barrinani nyulu. 8Ngayu yawumba narrinya wabudana, ngala nanangini jalija badajba, janyulu yawumba Kunyba Ngarndu nangangi Kudkanyi narrindu. Janyulu yawumba nanda Kunyba Ngarndu nangangi Kudkanyi narrindu kurduluna.” Nani barri karuyi yalunya Junwanyi. Barriwa.

Ngurrunbayi Jisus Junwanyi Ngurrunbawarranyi.

9Nanamanji barri badajbayi Jisus nangandurri Junyurri. Badajba nyuli langina nanganginbunanyi yajinanyi, niji Nasarid. Nanda yaji Nasarid, nananyina walkurranyina yajina, niji Kalili, Badajbayi Jisus nangandurri Junyurri, baki ngurrunbayi Jisus wabudana Junwanyi. Ngurrunba nyuli Jisus bundalina, niji Jurdan. 10Jali walajba Jisus wabudananyi, baki yinarramba nyuli najba laliji kingkarri. Najba nyuli laliji bardawambikurri nangka. Baki najba nyuli nanda Kunyba Ngarndu nangangi Kudkanyi karralankurri kingkarrinya wayka nangandurri. Karralayi nanda Kunyba Ngarndu Kudkanyi nangandurri, baki jungkuyi ngarndu nangandu kulajina, barrinani babangka kulukuku kingkarrinya wayka, baki jungkuka kurndana. 11Baki yanybayi Kud jangkurr kingkarrinya. Nayi nyuli yanyba, “Ninji barri ngakinmirra jandanyi, jala ngayu maruka muwa kudanyu barri. Ninji jungkuka kunyba. Ngayu mirnarrijbangka muwa nganyi barri.” Barriwa.

Balanjayi Jisus Sayidinwanyi.

12Yinarramba barri manjijbayi Jisus kingkarri Kunybawanyi Ngarnduwanyi Kudkanyi. Manjijba nyuli Jisus kingkarri dungalarri. Jungkuyi Jisus nanaba dungalana. Mikuyaji yingkanyi nangandu. Yurlwa yali nganinyimuku nanankanyi mulijinyi yajinyi. 13Jungkuyi Jisus nanaba nyuluman, baki jawuda bijbawarr yanimal nanaba nangandu marda. Jungku nyuli nanaba yingamali yakarl, baki bijal mili nyuli jungku nanaba. Ngala badajbayi nanda mambuka wuwarranyi, niji Sayidin. Badajba nyuli nangandurri Jisusyurri, baki balanja nyuli Jisus. Nulijba nyuli nangangi Jisuskanyi, nyulu yanybikanyi balki jangkurr nangangi Kudkanyi, nyulu yabimbikanyi balki yaji nangangi barri. Nanankardi barri nyuli balanja Jisus, ngala jungkuyi Jisus kunyba yurrngumba barri. Baki nanamuku Yanjilmuku jalili yalu waki nangangi Kudkanyi, badajba yali nangandurri Jisusyurri. Lalanba yali Jisus nanaba mulijina yajina. Barriwa.

Kujarra Baki Kujarra Yali Jilajba Jisusnyina.

14Baku barri yali wudumba nanda Jun Ngurrunbawarr. Wudumba yali Jun ngarrkadabawarrmukunyi, baki kijijba yali. Yarrijba yali brisinyina. Barriwa. Bayngkani barri barlbayi Jisus langki nanankurri walkurrayngkurri yajiyurri, niji Kalili. Jungku nyuli nanaba, baki karu nyuli yalunya nanankanyi kunybanyi jangkurranyi nanganginkanyi Kudkanyi. 15Yanybayi Jisus nayi barri yalungi, “Nanijba barri yuku narri jungku kunyba nangangi Kudkanyi, baki janyulu lalanba narrinya Kudwanyi. Wijba narri jungku balki. Yangkalamba narringka narringinbunanyi balkinanyi yajinanyi, baki janarri kuyu nayinda kunyba jangkurr nangangi Kudkanyi. Jungku janarri kunyba nangangi Kudkanyi yurrngumba barri. Ngindu janarringka muwa narringinkanyi balkinyi yajinyi. Kuyu janarri nayinda kunyba jangkurr nangangi Kudkanyi, baki janyulu lalanba narrinya yurrngumba barri.” Nani barri milidimbayi yalunya Jisuswanyi. Barriwa.

16Jilajbayi Jisus yundu bayunguna wabudana. Walkurra nanda wabuda, barrinani kanja, niji barri Kanja Kalili. Jilajbayi Jisus, baki najba nyuli bulanya buwakula, Sayimin baki Yandru. Nyulu najbayi bulanya janybikurri bardija wayka wabudarri. Janyba bulili bardija wayka kakunyi, mungkijbirriwuyanyi. Nani barri bulili waki yurrngumba wudumbikanyi kaku. 17Yanybayi Jisus bulangi, “Jilajba janimbala ngakinduwa. Janimbala jungku ngakindu yurrngumba barri, baki jangayu milidimba nimbalanya. Nanijba barri nimbala wudumbaka kaku, ngala baku barri janimbala wudumba yingkamuku ngaki nganinyimuku.” 18Baki yinarramba buli yingijba nanda bardija. Yingijba buli bardija yurrngumba barri, baki jilajba buli nangandu Jisusnyina. Barriwa. 19Jilajba yali bijal mili bayunguna wabudana, baki najba yali yingkawuya buwakula bulanya. Najbayi bulanya, Jayims baki Jun. Marda nijanganjinyi bulangi, niji nangangi Jibidi, nyuli bulandu marda. Jungku yali muwardana, baki ngarrkadaba yali nanda bardawa badija. 20Najbayi yalunya Jisuswanyi baki yinarramba nyuli yanyba bulangi buwakulayngka, bulaja jilajba nangandu Jisusnyina. Baki yingijba buli nanda nijanganjinyi bulangi. Nyuli wambu jungku muwardana, baki jawuda wakiwarr nangandu. Ngala barlba buli buwakula nangandu Jisusnyina. Barriwa.

Jakajbayi Wuwarr Mankanyinanyi Jisuswanyi.

21Jilajba yali, baki wanbiya yali nananyina barrawuyabarrawuyana, niji Kabirnayum, baki jungku yali nanaba. Ngala nyulu Sadidi, baki ngankijba yali jurjina. Baki yanybayi Jisus yalungi nanaba jurjina. Nyulu milidimbayi yalunya nanganginkanyi jangkurranyi Kudkanyi. 22Manku yali nangangi jangkurr, baki manmala yali. Manmala yali kudanyu barri. Mankumanku yalungki, “Wanyi nayinda. Wanyi. Miku nyulimi barrinani nanamuku milidimbawarrmuku yuwanyi Musiskanyi. Yalili milidimba ngawamba nanankanyi wankalanyi yuwanyi. Ngala nayinda barri yinini nyulu. Nyulu yanybaka jangkurr nangangi Kudkanyi barrinani walkurra mambuka. Wanyi nyulu. Wanyi.” Barriwa. Nani barri yalungki mankumanku nangangi Jisuskanyi. 23Ngala yanybayi Jisus yalungi jurjina, baki ngankijbayi yingka nganinyi jurjina. Jungkuyi balki wuwarr nangandu mankanyina. Ngankijbayi nanda nganinyi wuwarryudi, 24baki kaya nyuli kudanyu barri, “Ninji barri Jisus, nganyi yaji Nasarid. Wanyimba janinji nurrungi. Badajba kuna ninji kurdanbiji nurrunya. Ngayu jingkijbangka ninya, ninji barri nanda malaba nangangi Kudkanyi.” Barriwa. 25Ngala ngirrwayi Jisus nanankanyi wuwarranyi. Ngirrwa nyuli nangangi, “Kardakiyi jungku. Karda. Walajbakiyi nanganbunanyi mankanyinanyi. Walajbakiyi.” Barriwa. 26Ngala janybayi nanda nganinyi wayka jambarri wuwarrwanyi. Janyba nyuli wayka, baki kayayi nanda wuwarr kudanyu barri. Kaya nyuli kudanyu, baki walajba nyuli nanganbunanyi mankanyinanyi. Baki yuku barri nanda nganinyi. 27Ngala nanamuku barri jali yalu karrinja nanaba lukuluku bulandu, manmala yali. Kudanyu yali manmala nanankanyi jali yalu najba, baki yililikajba yalungki nangangi Jisuskanyi, “Wanyi nayinda. Wanyi. Nyulu kuna buyingkinyi milidimbawarr. Nyulu yanybaka barrinani yalu yanybaka walkurramuku mambukamuku. Jirrinybaka nyulu wuwarrmuku, yalu walaykanyi mankanyinanyi, baki yalu ngayangayijbangka nanganginkanyi jangkurranyi, yalu walajbangka mankanyinanyi.” Nani barri yalungki yanyba nangangi Jisuskanyi. 28Yingkamukunyi yalunjali karu yingkamuku nangangi Jisuskanyi, jabarri yalunjali karu yingkamuku nangangi barri. Kajamukunyi yali manku jangkurr nangangi Jisuskanyi, baki nanganginkanyi jangkurranyi. Kajamukunyi jalili yalu jungku langkiya baki bayinga, karriya baki kulaya nananyina walkurranyina yajina Kalili, yali manku jangkurr nangangi. Barriwa.

Kunymambayi Yalunya Kajamuku Jisuswanyi.

29Walajbayi Jisus jurjnanyi, baki jilajba nyuli barrawurri. Nanda bulangi barrawu, buwakulayngka, Sayiminkanyi, baki Yandrukanyi. Ngankijbayi Jisus nanaba barrawuna, marda kujarra kandiwuya nangandu, Jayims baki Jun. 30Nanaba barrawuna kulukayi bardibardi jali nyulu lunji. Nyuli ngunyarringanja nangangi Sayiminkanyi. Ngarrangarra nyuli mankanyi. Karu yali Jisus nanankanyi bardibardinyi, nyuli lunji. 31Jilajbayi Jisus nangandurri, marrimba nyuli bardibardi marni, baki kingkarrumba nyuli bardibardi marninanyi. Kunybijbayi nanda bardibardi mankanyi. Mardumardu mankanyi. Walajba nyuli baki wudumbayi mama yalungi barri. Barriwa. 32Ngabungaburri barri, ngala nyulu bijal mungarri yaji, baki kuyu yalunjali nangandurri Jisusyurri. Kajamuku jali yalu lunji, baki kajamuku jali yalu wuwarryudi, yalunjali kuyu nangandurri Jisusyurri, ngala nyulu bijal mungarri yaji. 33Baki bukambiju jali yalu jungku nananyina yajina, yali jilajba nanankurri barrawurri jali jungku Jisus. Kajamuku, wirdikudukudumuku yali jilajba nanankurri, baki karrinja yali danbina. 34Baki kunymambayi yalunya Jisuswanyi. Kunymamba nyuli bukambiju jali yalu lunji. Jakajba nyuli wuwarr yalunbunanyi mankanyinanyi. Baki kardamba nyuli wuwarr yanybikanyi. Jingkijba yali Jisus wuwarrmukunyi, baki nanankardi nyuli kardamba yalunya yanybikanyi. Barriwa.

Milidimbayi Yalunya Jisuswanyi.

35Munganawa barri ngala nyuli kamambawurri yaji, baki walajbayi Jisus. Walajba nyuli barrawunanyi, baki jilajba nyuli munjiyurri. Mikuyaji yingkanyi nanaba. Nyubana nyuli jungku. Baki yanybayi Jisus mududu nangangi Kudkanyi. Yanyba nyuli mududu nangangi Kudkanyi nanaba nyubana. Barriwa. 36Bijal barri kamu walajbayi Sayimin, baki yingkamuku nangandu. Durrijba yali Jisus. 37Wakaramba yali Jisus, baki yanyba yali nangangi, “Kajamuku barri yalu kujbangka nganyi. Yalu kujbangka nganyi bukambiju.” 38Ngala yanybayi Jisus yalungi, “Ngambalaja jilajba yingkarri barrawuyabarrawuyarri, baki yingkarri barrawuyabarrayuwarri. Jangambala yidamba kajamuku barrawuyabarrawuya, baki jangayu yanyba yalungi. Jangayu milidimba yalunya marda jangkurranyi. Nanankardi barri ngayi badajba milidimbiji yalunya kajamuku.” Barriwa. 39Baki mili jilajbayi Jisus. Jilalajba nyuli lukuluku barri nananyina yajina Kalili. Jilalajba nyuli langki, kula, bayungu, baki karri. Kaja jurj nyuli nanaba yajina, baki ngankijba nyuli yingkana baki yingkana baki yingkana milidimbiji yalunya. Milidimba nyuli yalunya kajana jurjina. Baki kajamuku jali yalu wuwarryudi mankanyi, nyuli jakajba wuwarr yalunbunanyi mankanyinanyi. Barriwa.

Kunymambayi Nganinyi Jisuswanyi.

40Jilajbayi nganinyi nangandurri Jisusyurri. Nanda nganinyi ngujbulijba nyuli nangangi waba bukamba. Yingkamuku yalili marrala nanankanyi nanganginkanyi ngalyanyi. Mikukiyanyi kunybijba mankanyi. Jiwilijbayi nanda ngalya nangandu, baki janangka janyba baku barri. Nanankardi barri kudanyu yalili marrala nanankanyi ngalyanyi. Jilajba nyuli nangandurri Jisusyurri, baki mururu nyuli wayka mujina nangandu Jisusnyina, baki yanybayi nangangi Jisuskanyi, “Jaliyi ninji nulijba ngaki, kunymambikanyi ngaki mankanyi, baki yuku ninji kunymamba ngaki mankanyi.” Barriwa. 41Nginduyi Jisus muwa nangangi. Ngindu nyuli muwa nangangi, baki manjijba nangki marni. Manjijba nangki Jisus marni nangandurri, baki marrimbayi nanda nganinyi. Baki yanybayi Jisus nangangi, “Ngayu nulijbangka nganyi, kunymambikanyi ninga mankanyi. Kunybakiyi jungku mankanyi.” 42Baki yinarramba kunybijbayi nangangi mankanyi. Mili kunyba nangangi waba. 43-44Baki jirrinybayi nanda nganinyi Jisuswanyi. Maramaramba nyuli, “Mikujiyi karu yalunya yingkamuku jali ngayu kunymamba nganyi mankanyi. Mikujiyi karu yalunya. Ngala jilajbakiyi nangandurri, nanankurri mambukarri jurjkanyi. Minimbakiyi nganyingka mankanyi nangangi, baki muningka wajbakiyi Kud barnyinyi. Nani barri yanybayi nanda wankalanyi Musis, muningka waykanyi Kud barnyinyi. Jayalu wajba Kud barnyinyi, jalija kunybijba mankanyi. Nanankardi barri, janinji wajba Kud barnyinyi, baki yingkamukunyi jayalu jingkijba ninya, ninji mirnarrijba muwa nangangi Kudkanyi, kunybijbangkangangi nganyi mankanyi.” Barriwa. Nani barri jirrinybayi nganinyi Jisuswanyi. Maramaramba nyuli nganinyi, baki manjijba nyuli nanda nganinyi nangandurri mambukarri jurjkanyi. 45Ngala mikukiyanyi karda jungku nanda nganinyi. Jilajba nyuli, baki karu nyuli yalunya bukambiju nangangi Jisuskanyi. Nyuli karu yalunya nangangi Jisuskanyi, nyuli kunymamba nangangi mankanyi. Mankuyi nanda jangkurr kajamukunyi, baki jilajba yali nangandurri Jisusyurri, wirdikudukudumuku. Jilalajba yali nangandu lukuluku yurrngumba barri. Baki nanankardi barri mikukiyanyi mili jilalajba Jisus barrawuyabarrawuyana, ngala jungku nyuli munji. Ngala kajamuku yali jilajba nangandurri munjiyurri. Jilajba yali langina baki bayunguna, karrina baki kulani. Malimalijba yalungki nangandurri Jisusyurri. Barriwa.

Kunyba Jangkurr Kudkanyi

Wycliffe Bible Translators, Inc. All rights reserved

More Info | Version Index