Chwilio ffurf

ESEKIELE 10

1Ha ke boela ke tadima, ka bona sebakeng se okametseng dihlooho tsa dikerubime ho le ho kang lejwe la safire, ho kang ntho e nang le ponahalo ya terone, e bonwang hodimo ho tsona. 2Yaba o bua le monna ya apereng lene, a re: Kena kahare ho mabidi, tlasa dikerubime, o kakole mashala a hlenneng ka diatla tsa hao tse pedi mahareng a dikerubime, o a tshollele motseng. Mme a tla teng, ke ntse ke mmona. 3Haele dikerubime, di ne di eme ka nqa ho le letona ho tempele, ha monna eo a etla, mme leru le ne le tletse lebala le kahare. 4Yaba kganya ya Jehova e tloha dikerubimeng, ya ikela mohatong wa monyako wa tempele; tempele ya tlala leru, lebala lona le ntse le tletse phatsimo ya kganya ya Jehova. 5Modumo wa dipheo tsa dikerubime wa utlwahala le lebaleng le kantle, o ka lentswe la Modimo o matla wohle, ha o bua. 6Eitse hobane a laele monna ya apereng lene, ka ho re: Nka mollo dipakeng tsa mabidi, mahareng a dikerubime; a tla, a ema pela lebidi le leng. 7Yaba kerubime e nanabeletsa letsoho mollong o mahareng a dikerubime, e le dipakeng tsa dikerubime, ya nka mollo, ya o bea diatleng tsa ya apereng lene; eo a o nka, a tswela ntle. 8Haele dikerubime, ho ne ho bonwa ntho e kang letsoho la motho tlasa dipheo tsa tsona. 9Eitse ha ke tadima, ka bona mabidi a mane pela dikerubime; lebidi le leng pela kerubime e nngwe, lebidi le leng hape pela kerubime e nngwe; ponahalo ya mabidi e ne e ka ponahalo ya lejwe la krisolithe. 10Haele ponahalo ya mabidi, bone ba wona a ne a ena le sebopeho se le seng jwaloka hojane lebidi le leng le kene kahare ho le leng. 11Ho tsamayeng ha wona a ne a tsamaya ka dintlha tse nne tsa wona; ho tsamayeng ha wona, a ne a sa bidikane; hobane nqa efe le efe moo hlooho e neng e leba teng, a ne a e latela; ho tsamayeng ha wona a ne a sa bidikane. 12Mmele yohle ya dikerubime, le mekokotlo ya tsona, le matsoho a tsona, le dipheo tsa tsona, le wona mabidi, di ne di tletse mahlo kahohle, e le bone ba tsona le mabidi a tsona. 13Haele mabidi, ka utlwa a reilwe lebitso la setsokotsane. 14E nngwe le e nngwe e ne e na le difahleho tse nne. Sefahleho sa ya pele e ne e le sefahleho sa kerubime, sefahleho sa ya bobedi e ne e le sefahleho sa motho, sa ya boraro e le sefahleho sa tau, sa ya bone e le sefahleho sa ntsu. 15Yaba dikerubime di a phahama; e ne e le sona sebopuwa seo ke na beng ke se bone pela noka ya Kebare. 16Enereha dikerubime di tsamaya, mabidi le wona a tsamaye maloka le tsona; ereha dikerubime di otlolla dipheo tsa tsona ho phahamela lefatshe, mabidi a ne a sa di kgelohe. 17Ha di ne di ema, le wona a eme; ereha di phahama, a phahame hammoho le tsona, hobane moya wa sebopuwa o ne o le ho wona.

18Jwale, kganya ya Jehova ya tloha mohatong wa monyako wa tempele, ya ema hodima dikerubime. 19Yaba dikerubime di otlolla dipheo tsa tsona, tsa tloha fatshe; ka di bona ha di etswa, le mabidi a bapile le tsona. Tsa ya ema monyakong wa botjhabela wa tempele ya Jehova, kganya ya Modimo wa Iseraele e le hodima tsona, nqa hodimo. 20E ne e le sona sebopuwa seo ke na beng ke se bone katlasa Modimo wa Iseraele, pela noka ya Kebare, mme ka tseba hoba ke dikerubime. 21E nngwe le e nngwe e ne e na le difahleho tse nne, e nngwe le e nngwe ya tsona hape e ne e na le dipheo tse nne; tlasa dipheo tsa tsona, ho ne ho hlaha ntho e kang matsoho a motho. 22Haele tshobotsi ya difahleho tsa tsona, e ne e le tsona difahleho tseo ke na beng ke di bone pela noka ya Kebare, e le ponahalo e le nngwe, e le tsona tsona. Di ne di tsamaya, e nngwe le e nngwe e lokile feela.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index