Chwilio ffurf

Éxodo 18

Jetro Moisemaa pꞌasiade wãda

1Moisés chãure Jetro Madián eujãdepema pꞌaare paji. Irua ũriji sãgá Tachi Akꞌõrepa Moisés mãikꞌaapa israelitaarã Egipto eujãdeepa uchiapida mãikꞌaapa ode wãdakꞌãri, kꞌaripada. 2Naaweda Egiptodee wãdade Moisepa chi wẽra Séfora, chi warrarã ome ãpɨtee pëikꞌãri, Jetropa ãra auteebaiji. 3Moisés warrarãdepema aba tꞌɨ̃jarapachida Guersón.+ Moisepa mãga tꞌɨ̃ bɨji ichi Madián eujãde bakꞌãri, awaraa eujãdepema pada perã. 4Chi apema warra tꞌɨ̃jarapachida Eliezer+ Moisepa mãga tꞌɨ̃ bɨji ‘Mɨ akꞌõre Akꞌõre Waibɨapa Faraón juadeepa mɨ kꞌaripajida’ ada perã.

5Moisés israelitaarã ome Tachi Akꞌõre ee ikꞌaawa, eujã pania wẽe bɨde pꞌanɨde chi chãure Jetro mãikꞌaapa chi wẽra, chi warrarã ome, Madiandeepa chejida. 6Ma chewãdade Jetropa Moisemaa jara pëiji: “Mɨ, pɨ chãure, pɨ wẽra pɨchi warrarã ome pɨ akꞌɨde wãruta.”

7Mãga jaranadakꞌãri, Moisés uchiaji chi chãure auteebaide. Iru kꞌĩrapite ɨ̃jaabaipꞌeda, kꞌĩra tarrade ɨ̃tꞌaaji mãikꞌaapa saludaadapꞌeda, te ne–edee oodade tꞌĩujida. 8Mama Moisepa chi chãuremaa jõma nepɨrɨji Tachi Akꞌõrepa israelitaarã pari ooda: irua ooda Faraonmaa mãikꞌaapa Egipto pidaarãmaa; israelitaarã ode wãdade pꞌasadapꞌedaa mãikꞌaapa irua ne–inaa jõmaade ãchi kꞌaripada. 9Jetropa mãga ũrikꞌãri, o–ĩadachi Tachi Akꞌõrepa mãga ooda perã mãikꞌaapa israelitaarã Egipto pidaarã juadeepa kꞌaripa atada perã. 10Mapa mãgaji:

—¡Tachi Akꞌõre tꞌãri pia baparida! aji. ¡Iruata parã israelitaarã uchiapiji Faraón juadeepa mãikꞌaapa awaraa Egipto pidaarã juadeepa! 11Uchiapiji ma audua beerã jua ekꞌariipa. Ɨ̃rá mɨa ijãa bɨ wãara Tachi Akꞌõre waibɨara bɨ awaraa akꞌõre waibɨa apataarã jõmaweda kꞌãyaara.

12Mãga jarapꞌeda, Jetropa ne–animal aneeji peepꞌeda, Tachi Akꞌõre–itꞌee paa jõpiitꞌee. Ma awara Tachi Akꞌõre–itꞌee awaraa ne–animalaarã paaji, arii pꞌanadapꞌedaarã ome jedekꞌodaitꞌee. Mãgá Aarón awaraa israelitaarã poro waibɨarã ome, Jetro paara, Tachi Akꞌõre kꞌĩrapite nekꞌonajida.

Moisepa charraarã bɨda israelitaarã kꞌaripadamerã

13Moisés israelitaarã poro waibɨa paji. Maperã aɨ norema israelitaarãpa ãchi nepɨra jara chejida irua kꞌaripamerã. Tapꞌedadeepa kꞌewara parumaa Moisepa ãchi nepɨra ũripachi. 14Chi chãurepa mãga unukꞌãri, mãgaji:

—¿Kꞌãata oomaa bɨ na eperãarã ome? ¿Sãapꞌeda pɨ aupai nama su–akꞌɨ bɨma eperãarã nepɨra akꞌɨmaa? Ãchi taarã akꞌɨnɨ̃ pꞌaneepatada aji, ãchi nepɨra pɨmaa jaradai naaweda.

15Moisepa pꞌanauji:

—Eperãarã mɨmaa chepata Tachi Akꞌõremaa ne–inaa iidi kꞌinia pꞌanadakꞌãri. 16Awaraarã ome nepɨra iru pꞌanadakꞌãri, chepata mɨa jaramerã chisãgɨpa pia ooda wa chisãgɨpa kꞌachia ooda. Mãga jara bɨde mɨa kꞌawapipari Tachi Akꞌõre ley mãikꞌaapa irua mɨmaa jarateeda.

17Mãga ũrikꞌãri, chi chãurepa ũraaji:

—Pia–e bɨda aji, pɨa oomaa bɨ, audú mimia bairã. 18Pɨ audú sẽdai wã, pɨ ome pꞌanɨɨrã paara. Pɨ ituaba nãgɨ́ mimia pꞌoyaa oo–e. 19Pia ũríji mɨa ũraaru. Mãga ooru pɨrã, Tachi Akꞌõrepa pɨ kꞌaripaitꞌee. Na eperãarã pari pɨa Tachi Akꞌõremaa ãra nepɨra jaraipia bɨ. 20Ichiaba na eperãarãmaa jarateeipia bɨ Tachi Akꞌõre ley mãikꞌaapa irua pɨmaa jarateeda. Ma awara jarateeipia bɨ irua oopi kꞌinia bɨkꞌa oo kꞌawaa wãdamerã mãikꞌaapa irua kꞌinia bɨkꞌa pꞌanapataadamerã. 21Jɨrɨtꞌeráji nãgee ɨmɨkꞌĩraarã pɨ kꞌaripadamerã na mimia ome: kꞌĩsia kꞌawaa beerã; Tachi Akꞌõre waawee pꞌanapataarã; kꞌĩra jĩpꞌa pꞌanapataarã; chĩara kꞌũradakꞌaa beerã pꞌaratꞌa jitadaitꞌee. Mãgɨɨrã bɨ́ji israelitaarã poro waibɨarãkꞌa eperãarã akꞌɨpataadamerã. Ũkꞌuruurãpa mil iru pꞌanadai ãchi jua ekꞌari; awaraarãpa cien; awaraarãpa cincuenta mãikꞌaapa awaraarãpa diez. 22Mãɨrãpa israelitaarã nepɨra jara chepata ũridaipia bɨ. Chi nepɨra waibɨara bɨ aupai ãrapa pɨmaa nepɨrɨ chedai. Mãgá ãrapa kꞌaripadai pɨ makꞌɨara mimianaamerã. 23Pɨa ooru pɨrã mɨa ũraa bɨkꞌa mãikꞌaapa Tachi Akꞌõrepa mɨa jara bɨkꞌa pɨmaa oopiru pɨrã, pɨa chooi. Ma awara eperãarã ãchi temaa o–ĩa wãdayada aji.

24Moisepa chi chãure pedee ijãaji. Chi chãurepa jaradakꞌa jõmaweda ooji. 25Israelitaarãdepema ɨmɨkꞌĩraarã kꞌĩsia kꞌawaa beerã jɨrɨtꞌeraji mãikꞌaapa ãra jua ekꞌari bɨji eperãarã mil, cien, cincuenta mãikꞌaapa diez. 26Ewari chaa ãrapa charraarã mimia oopachida israelitaarã tꞌãide. Mamĩda nepɨra waibɨa bakꞌãri, Moisemaa wãpachida.

27Tꞌẽepai Moisés, chi chãure ome despediipꞌeda, Jetro ichi eujãdee wãji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index