Chwilio ffurf

Mak 5

Yesu Oloto Aluwa Gebogebodi A Sunesuneḡina I Waiyawasani

(Metiu 8:28-34; Luk 8:26-39)

1Yesu bi ena tauwaikaiwatana Galili topana nevanemo, noi Gelasin lavedi edi dobumo. 2Laḡannemo Yesu waga dabanemo bi i potipoti yovo te, oloto aluwa gebogebodi a sunesuneḡina, tana tauyewamo bi i velau i tava Yesu lisinemo. 3-5Niga olotona tauyewaḡa miyamiya nawina, mote aiyai ḡemoḡemotina te ya katautau. Tana suwala bi dudubala tauyewaḡa bi dakiḡa i binabinau nawa, bi sabilemo tunina i sesesidi. Bi tana laḡani matabuna kaḡena bi nimana seinimo a panipanidi bi geḡa te i katikati ḡavuḡavukidi. 6Laḡaninemo tana Yesu manekemo i kitakita, te i velau Yesu kaḡe pakanemo bi tuwapekana i wai tupagwaliye. 7Bi kalinana dididiginemo i giuna gado, “Yesu Maimaituwa saḡasaḡa guletina Natuna tam bai lisigumo kwa kauwe? Maimaituwa isanemo ya giugiuwem te mote kuma laukivigebogeboegu.” 8Oloto niga mai i giuna ba banina, Yesu kaikana niga mai i giuwe, “Tam aluwa gebogebom oloto ku potiyovo kamaḡe.”

9Ḡome Yesu oloto i waitalayena gado, “Tam isam bainewa?” Te tana niga mai i giuvite, “Tagu isagu kumna tama kewapa kauwa.”

10Bi tana yaḡolo te Yesu i waibaḡa gulate te maso mote i giu kamaḡe nawedi wali dobumo.

11Bi kota ḡome buwawa kumna dididiga a yabayaba oya nevakaunemo. 12Kamaina bi aluwa gebogebodi Yesu ai baḡa gulatena gado, “Kwa giu kamaḡemai buwawa lisidimo te nopodimo ka sola.” 13Kamaina bi Yesu aluwa gebogebodi i giu kamaḡedi. Mba ḡome a potipoti yovo te buwawa nopodimo a sola. Buwawa kumna wapana 2 tausan dabakai a velauwata a yovoyovona, topamo a tona.

14Bi buwawa tauḡamodi a velau a nawa malagai nopodiḡa bi malagai diadianaḡa bi bai i tubutubuḡana, lava a giuwedi. Bi lava a tava te bai i tubutubuḡana kitana aubaina. 15Laḡannemo lavedi oloto lisinemo a tavana, tedi ḡome oloto a kita, i wai gala kauwa bi ena noḡota didimaninemo i miyamiya. Mba olotona wala aluwa gebogebodi a sunesuneḡina, bi lavedi a naila kauwa. 16Mabai mba kauwina taukitana tedi lava ḡesaudi a giuwedi te oloto aluwa gebogebodi a sunesuneḡina lisinemo bai i tubuḡa. Bi kota tedi buwawa lisidimo bai i tubutubuḡana vaitena a giuwedi. 17Taunana aubaina tedi Yesu ai baḡa gulate te edi dobu ya gose.

18Laḡaninemo Yesu wagamo i gelugelu tena, oloto wala aluwa gebogebodi a sunesuneḡina tana Yesu i wai baḡa kauwe te vaitena maso a nawa. 19Bi Yesu mote i wai anine bi i giuwena gado, “Kwa munaḡa em vanuwa lavedi lisidimo bi Bada bai lisimmo i kauwe bi ena laukivivisuvisu tedi kwa giuwedi.” 20Kamaina tena oloto i modina i nawa malagai 10 nopodiḡa bi bai Yesu lisinemo i kaukauwena, lava i giu nawedi. Bi lava a vaivaiyena a sove.

Yesu Diaelasi natuna waivina bi waivini i waiyawasanidi

(Metiu 9:18-26; Luk 8:40-56)

21Yesu wagaḡa i munaḡa nawa noi nevanemo i tava. Tana topa diyanemo i miyamiya bi lava kumna a tava dubutawi. 22Ḡome bolu vanuwina taulabena isana Diaelasi i tava ḡome Yesu i kita. Tana Yesu kaḡe pakanemo tuwapekana i waitupagwaliye 23bi nuwana tabutabunemo i wai baḡana gado, “Natugu waivina ḡaubona i sida kauwa ḡotona te ya peki. Ae kwa nato nimam dabanemo kwa sako te ya yawasana bi ya miya.” 24Kamaina bi Yesu vaitena a nawa. Bi kota lava kumna dididiga tana a kaiwata bi a bibibini.

25Ḡome waivini ḡemota kwalabu wapana 12 kwasina i miyamiya kamakamaḡena. 26Niga waivinina ena mane matabuna doketa lisidimo i wai yakale. Bena maso i yawayawasana, ba sida i dididiga. 27Laḡannemo waivinina Yesu giuna i vaiye, tana lava kumna mododiḡa Yesu mulinaḡa i saḡa bi ena gala isu damodamonaḡa i taukoni. 28Tana noponemo niga mai i wai noḡota, “Bamoda Yesu ena galaḡa ya taukonina, ba ya yawasana.” 29Mote lofana ḡome waivinina ena sida kwasina i miyamiya kamakamaḡena i kovi. Bi tuninemo mayana i vai te ena wainuwatoimo i yawasana. 30Yesu ḡome maḡemota mayana i vai te ḡailisi lisinemo i potiyovo. Bi i tauvitale lava kumna nopodimo bi ḡome lava kumna i wai talayedi, “Aiyai i taukonigu?” 31Ena tauwaikaiwatana tana niga mai a giuwe, “Tam kuna kita te lava kumna sa bibibinim, bi kuna giu te aiyai i taukonigu?” 32Bi tana yaḡolo te i wai laulau kita te waivini aiyai tana ena gala i taukoni. 33Tena ḡome waivini i noḡoti munaḡe te tana i taukoni. Taunana aubaina tana ma nailina bi magusuna i tava Yesu kaḡe pakanemo te tuwapekana i wai tupagwaliye, bi mwali matabuna i wai amagai. 34Bi Yesu waivinina i giuwena gado, “Keulo, em sumaḡa i wai yawasanim. Em sida i kovi, bi ma nuwaubam kwanawa.”

35Yesu yaḡolo waivini lisinemo i giugiu te Diaelasi ena vanuwa lavedi a tava bi a giuwena gado, “Tauwailovelove kuma kaka nuwalaḡalaḡa natum kaikana i kovi.”

36Tedi mai a giugiu ba Yesu beya damodamonemo i vaiyedi bi bolu vanuwina taulabena i giuwena gado, “Nuwam ima kulukuluva kwai sumaḡa ota.” 37Yesu ḡome lava matabudi i wai ḡakedi, kamaina Pita, Diyemesi bi tasina Diyoni taudiḡa tana vaitena a nawa. 38Tedi a nawa Diaelasi ena vanuwemo a tavatava, ḡome lava i kitedi a ḡabaḡaba bi, a leleyakeyake bi a nusanusa. 39Yesu vanuwa noponemo i valageta bi i giuwedina gado, “Bai aubaina ko wai nuwapoyae bi ko ḡabaḡaba? Gomana mote i peki tana ya kenakena ota.”

40Lava ḡome Yesu ai gwaigwaiye aubaina, lava i giuwedi a potiyovo doḡamo. Gome Yesu bi ena tauwaikaiwatana faiona vaitedi a saḡa noke gomana lisinemo. Bi kota gomana tamana bi tinana. 41Kamaina bi Yesu gomana nimanemo i kabi bi i giuna gado, “Talita kum.” (Niga giuna banina ba keulo ya giugiuwem te kwa kenamoito.)

42Ma ḡemota gomana i kenamoito bi i moito nawa. Niga gomenina ena kwalabu ba 12. Lava niga kauwina a kita te a sove gulate. 43Yesu lava i waiḡakedi te bai i tubutubuḡana mote aiyai sima giuwe. Bi i giuwedi te kani gomana sa vite ya kani.

Kakabai Mak

© 2009, Wycliffe Bible Translators, Inc. All rights reserved. More Info | Version Index