Chwilio ffurf

Lɔn 7

Solomani ka adamadenya

1Ne fana ye mɔgɔ le ye,

ne fana bena sa, i ko tɔw bɛɛ.

Mɔgɔ fɔlɔ min bɔra bɔgɔ la,

ne fana bɔra ale lo la.

Ne labɛnna n baa kɔnɔ ka farisogo sɔrɔ.

2Ne ye kalo kɔnɔntɔn kɛ a joli la,

ne sɔrɔla cɛɛ ka jii barika la,

nisɔndiya sababu la sinɔgɔ waati la.

3Ne wolotɔ, ne fana ye fɔɲɔ nin ninakili sɔrɔ i ko bɛɛ.

Ne sera dugukolo kan bɛɛ be tɔɔrɔ yɔrɔ min.

N kanɲa fɔlɔ kɛra kasi ye i ko tɔw bɛɛ.

4Ne ye fani sɔrɔ,

n lamɔbagaw y'u janto n na kosɔbɛ.

5A masa te yen, min ka daminɛ bi danna nin na.

6Ka na diɲɛ na,

cogo kelen lo bɛɛ fɛ,

ka bɔ yen fana, o ye kelen ye.

Lɔnniya ka fisa nafolo bɛɛ ye

7O la, ne ye Ala dali,

a ye hakilitigiya di ne ma.

Ne y'a dali kosɔbɛ,

a ye lɔnniya hakili di ne ma.

8A koo diyara ne ye ka tɛmɛ masaya kan.

Ale ni nafolo cɛ,

ne ma nafolo jati fɛɛn ye.

9Ne m'a suma ni kabakuru sɔngɔgwɛlɛn ye.

Diɲɛ sanu bɛɛ lajɛnnin ye cɛncɛn dɔɔni ye ale ɲakɔrɔ.

Warigwɛ ye bɔgɔ le ye a ɲakɔrɔ.

10A koo diyara ne ye ka tɛmɛ kɛnɛya ni cɛɲɛ kan.

A koo diyara ne ye ka tɛmɛ yeelen kan,

bari ale ka nɔɔrɔ te ban ka ye.

11Ale barika la, ne ye fɛnɲuman bɛɛ sɔrɔ.

Ale sababu la, ne ye nafolo caaman sɔrɔ.

12Ne y'o fɛɛn nunu bɛɛ diya bɔ,

bari lɔnniya kama ne y'u sɔrɔ.

Ne tun m'a lɔn ka kɔrɔ ko

ale lo ye o fɛɛn nunu bɛɛ bɔyɔrɔ ye.

13Ne sera ka min lɔn ni kɔnɔgwɛ ye,

ne b'o yira ni nisɔndiya ye.

Ne t'a nafayɔrɔ si dogo.

14Bari, adamadenw ka nafolo banbali lo.

Minw man'a sɔrɔ,

olu be kɛ Ala teriw ye.

Ni mɔgɔ ye hakili sɔrɔ a fɛ,

o tigi koo be diy'a ye.

Lɔnniya bɔra Ala fɛ

15Ala ka ne dɛmɛ ne ka kuma ni hakilitigiya ye.

Min dira ne ma, ne ka miiriya ka bɛn o ma.

Bari, ale lo ye lɔnniya ka ɲabila ye,

ale lo be hakilitigiw bila siraɲuman kan.

16An b'a bolo,

anw n'an ka fɔtaw n'an ka lɔntaw,

n'an ka sekow bɛɛ.

17Ale lo ye lɔnniyasɔbɛ di ne ma diɲɛ koo la:

a ye diɲɛ labɛncogo n'a kɔnɔnafɛnw baara yira ne la,

18ni diɲɛ daminɛ,

n'a cɛmancɛ ani a laban,

ni tile bɔyɔrɔ yɛlɛmacogo,

ni waati yɛlɛmacogo,

19ni saanw cogoya,

ani lolow sigiyɔrɔw,

20ni sogow cogoya,

ni kongosogow ka kɛcogow,

ni jinaw cogoya,

ni adamaden ka miiriya,

ni yiriw sifaw, ani liliw ka baara.

21Koo dogonin ani yeta,

ne y'o bɛɛ lɔn.

Bari, fɛɛn bɛɛ danbaga ye ne kalan,

ale min ye lɔnniya ye.

Lɔnniya bɔyɔrɔ

22Lɔnniya kɔnɔ, hakiliɲuman be yen, a saniyanin.

Hakili kelen lo, min be koo caaman kɛ.

A be se koo yɛlɛmacogo la,

a te to yɔrɔ kelen,

a ɲɔgɔn te yen, fiɲɛ t'a la,

a gwɛnin lo, kojugu te se ka foyi kɛ a la.

Koɲuman ka d'a ye, a jijanin lo.

23Foyi t'a bali, a be koɲuman kɛ mɔgɔ ye,

adamaden teri lo.

A be to kelen kan,

a te bɔ a lɔyɔrɔ la, a te hami.

A be se fɛɛn bɛɛ la, a be fɛɛn bɛɛ ye.

A be don nimanfɛnw bɛɛ la,

hakilitigiw, ni minw saniyanin lo,

ani minw be se koo yɛlɛmacogo la.

24Lɔnniya ka teli ka tɛmɛ fɛɛn lamagata bɛɛ kan.

A ka saniya kosɔn,

a be tɛmɛ faan bɛɛ,

a be don fɛɛn bɛɛ la.

25Setigi Ala dafɔɲɔ lo,

a be bɔ Setigi ka nɔɔrɔ la,

a dafanin.

O la, nɔgɔ si te se ka don a la.

26Lɔnniya ye yeelen fagabali ye.

Dubalen fiɲɛtan lo,

Ala ka baara jaa be ye min kɔnɔ.

A ka ɲumanya taamasiɲɛ lo.

27A kelen lo, k'a sɔrɔ a be se koo bɛɛ la.

A cogo te yɛlɛma k'a sɔrɔ a be fɛɛn bɛɛ lakuraya.

A be don Ala ka mɔgɔw la waati bɛɛ,

k'u kɛ Ala teriw n'a ka kiraw ye.

28Bari, mɔgɔ minw be nɔrɔ lɔnniya la,

olu le koo ka di Ala ye.

29Lɔnniya ka yeelen tɛmɛna tile ta kan,

a tɛmɛna lolow bɛɛ ta kan.

N'i y'a suma ni yeelen ye,

a tɛmɛna o kan.

30Suu be ko yeelen taanin kɔ.

Nga kojugu te se ka foyi kɛ lɔnniya la.

ALA KA KUMA

© 2008 Alliance Biblique du Burkina Faso

More Info | Version Index