Chwilio ffurf

Zud 3

Cidenw be taga Olofɛrine fɛ

1U ye mɔgɔw ci ka taga bɛɛn ɲini ni Olofɛrine ye. U ko: 2«An filɛ i ɲakɔrɔ, an ye masacɛba Nabukodonozɔri ka baarakɛlaw ye. I k'an minɛ, cogo min ka d'i ye. 3An ka wɛɛrɛw, ni an ka dugukolo bɛɛ, n'an ka forow bɛɛ, n'an ka begɛnw, misi fara begɛnmisɛnw kan, n'an ka sigiyɔrɔw bɛɛ b'i bolo. I sago kɛ u la. 4An ka duguw ye i ta ye, u kɔnɔ mɔgɔw ye i ka jɔɔnw ye. Na don u kɔnɔ i sago la.» 5O cɛɛ nunu sera Olofɛrine fɛ k'o kuma fɔ a ye.

6A tagara n'a ka kɛlɛdenw ye kɔgɔji dafɛ mara la k'a ka kɛlɛden dɔw sigi dugu farimanw kɔnɔ, ani k'o yɔrɔ cɛfariw fara u kan. 7O yɔrɔ mɔgɔw n'u laminiw y'a kunbɛn ni masirifɛn dɔw ye u kuun na, ka dɔɔn kɛ, ani ka dundunw fɔ. 8A ye cɛnni kɛ u ka mara bɛɛ kɔnɔ, k'u ka jolɔgɔw tigɛ, bari a tun y'a latigɛ ko a bena joow bɛɛ cɛn ka bɔ dugukolo kan janko jamana bɛɛ mɔgɔw ka Nabukodonozɔri kelenpe le bato, ani siyaw bɛɛ minw be kaan o kaan fɔ, u bɛɛ ka dɛmɛ ɲini ale lo fɛ i n'a fɔ batofɛn. 9A sera Zizireyɛli gɛrɛfɛ, Dotayimu masurun na, Zude mara kuluw yɔrɔ faan fɛ. 10U sigira Gebayi ni Sitopolisi cɛ. A tora o yɔrɔ la kalo kelen kɔnɔ janko k'a ka kɛlɛdenw ka minanw bɛɛ lajɛn.

ALA KA KUMA

© 2008 Alliance Biblique du Burkina Faso

More Info | Version Index