Chwilio ffurf

MAKABEW FƆLƆ 9

Zuda Makabe ka saya

1Demetiriyusi y'a mɛn tuma min na ko Nikanɔri sara kɛlɛ la, ko Nikanɔri juguw ser'a ka kɛlɛdenw kɔrɔ, a ye Bakidɛsi ni Alikime ci Zuda mara la tugu n'a ka kɛlɛden ɲanamanw ye. 2U ye Galile mara sira ta ka taga Mezalɔti lamini, Arabɛli gɛrɛfɛ. U ye dugu nin minɛ ka mɔgɔ caaman faga o yɔrɔ la. 3Girɛkiw ka masaya saan 152nan kalo fɔlɔ la, u tagara u ka sigiyɔrɔ labɛn Zeruzalɛmu gɛrɛfɛ. 4O kɔ, u bɔra yen ka taga Beerizɛti faan fɛ ni kɛlɛden sennatigi mɔgɔ waa mugan (20 000) ye, ni sotigi mɔgɔ waa fila (2 000). 5Zuda tun y'a ka kɛlɛdenw sigiyɔrɔ labɛn Elaza. Kɛlɛdenŋana mɔgɔ waa saba (3 000) tun be n'a ye. 6U y'a ye k'u juguw ka kɛlɛdenw ka ca kosɔbɛ minkɛ, siranya y'u minɛ, u caaman bolila, mɔgɔ kɛmɛ seegi dɔrɔn tora. 7Zuda y'a ye ko a ka kɛlɛdenw bolila ka tunu, o y'a sɔrɔ kɛlɛ be ɲini ka daminɛ. A dusu cɛnna bari waati tun te yen tugu k'a ka mɔgɔw lajɛn. 8A jigi tigɛra, o bɛɛ n'a ta, a y'a fɔ a ka mɔgɔw tɔw ye ko: «Aw ye wili, an ka taga an juguw kama, k'u kɛlɛ n'an be se.» 9A ka kɛlɛdenw tun b'a fɛ k'a hakili yɛlɛma. U ko: «Sisan kɔni, an te se ka foyi kɛ fɔɔ k'an yɛrɛ ɲini dɔrɔn. Kɔfɛ, an bena na n'an balimaw ye yanni waati wɛrɛ, ka kɛlɛ daminɛ tugu. N'o tɛ, an ka dɔgɔ kojugu.» 10Zuda y'u jaabi ko: «Ne ka boli wa? Abada! A tena lakali yɔrɔ si ko ne bolila n juguw ɲa kɛlɛ la. N'an ka waati sera, an ka sa an balimaw kosɔn cɛya la. An kana sɔn an tɔgɔ ka cɛn.»

11Zuwifuw juguw ka kɛlɛdenw bɔra u ka sigiyɔrɔ la ka lɔ u ɲa. U ka sotigiw tilanna fila, kɛlɛden minw tun be ni kabakurubonnanw ye, olu ni kalatigiw tun be taama kɛlɛden tɔw ɲa. Kɛlɛdenŋanaw le tun be ɲafɛ, mɔgɔ jagwɛlɛnw bɛɛ. 12Bakidɛsi tun be kinibolo jɛnkulu kunna. Kɛlɛden sennatigiw tun be gwɛrɛla faan fila la, buruw be fiyɛra. Zuda ka mɔgɔw fana ye buruw fiyɛ. 13Dugukolo yɛrɛyɛrɛla kɛlɛbolo nunu ka mankan fɛ. Kɛlɛ daminɛna sɔgɔma, u tora a la fɔɔ wulafɛ. 14Zuda y'a ye ko Bakidɛsi n'a ka kɛlɛden ɲanamanw be kinibolo jɛnkulu la. Zuwifu minw jaa tun ka gwɛlɛ kosɔbɛ, olu bɛɛ lajɛnna Zuda kɔrɔ. 15U girinna Siri kɛlɛdenw ka kinibolo jɛnkulu kan k'u gwɛn fɔɔ ka taga se Azara kuluw la.m 16Numanbolo jɛnkulu y'a ye ko kinibolo mɔgɔw bolila tuma min na, u girinna Zuda n'a ka mɔgɔw kan u kɔfɛ. 17Kɛlɛ juguyara kosɔbɛ. Isirayɛliden caaman fagara, u juguw caaman fagara fana. 18Zuda fana fagara, Isirayɛliden tɔw bolila. 19Zonatan ni Simɔn y'u baden Zuda suu ta ka ta'a don u faaw ka kaburu kɔnɔ Modin. 20Isirayɛlidenw bɛɛ y'a suu kasi ka kule kosɔbɛ. U y'a sanga kɛ tile caaman kɔnɔ, 21n'u b'a fɔ ko: «Cɛfari min ye Isirayɛli kisi, ale kɛra di ka sa?»

22Zuda ka kɛwali tɔw, a ka kɛlɛkow, n'a ye kobaba minw kɛ, n'a ka cɛfari tɔgɔw, o tun ka ca fɔɔ a bɛɛ te se ka sɛbɛn.

Zonatan be Zuda nɔɔ ta

23Zuda sanin kɔ, Alaɲasiranbaliw wilila tugu Isirayɛli mara kɔnɔ yɔrɔ bɛɛ, ani kojugukɛlaw fana. 24Kɔngɔ tun gwanna kosɔbɛ minkɛ, jamana mɔgɔw tugura u kɔ. 25Bakidɛsi ye Alaɲasiranbali dɔw woloma k'u kɛ jamana kuntigiw ye. 26U y'a daminɛ ka to ka Zuda teriw yɔrɔ ɲini k'u minɛ, ka taga n'u ye Bakidɛsi fɛ. Ale tora k'u ɲaa gwan, k'u lɛɛbu. 27Isirayɛlidenw ye tɔɔrɔ sɔrɔ o waati la, u tun ma min ɲɔgɔn ye kabini kiraw ka kiraya baara laban tuma na. 28O la, Zuda teriw bɛɛ ye ɲɔgɔn lajɛn k'a fɔ Zonatan ye ko: 29«Kabin'i kɔrɔcɛ Zuda sara, mɔgɔ si te yen tugu i n'a fɔ ale, ka taga an juguw, ni Bakidɛsi, ani an ka siya kɔniyabagaw bɛɛ kama. 30O la, an b'i woloma bii k'i bila a nɔɔ na, i ka kɛ an ɲamɔgɔ n'an bilasirabaga ye an ka kɛlɛw la.» 31Zonatan sɔnna ka kɛ u kuntigi ye, a y'a kɔrɔcɛ Zuda nɔɔ ta.

Zonatan be Zan fagako juru sara

32Bakidɛsi y'o mɛn tuma min na, a daminɛna ka cogo ɲini waasa ka Zonatan faga. 33U y'o fɔ Zonatan n'a baden Simɔn ye, ni minw bɛɛ tun be n'a ye. U bolila ka taga Tekowa kongo la ka sigi Asifari jii marayɔrɔ gɛrɛfɛ. 34Bakidɛsi y'o mɛn lafiɲɛlon na. A ye Zurudɛn baji tigɛ n'a ka kɛlɛdenw bɛɛ ye. 35Zonatan y'a baden Zan ci, min tun be mɔgɔw kunna minw te kɛlɛdenw ye, ko a ka taga u teriw, nabatiw dali ko u ka sɔn olu b'u ka minanw kalifa u fɛ. Minan nunu tun ka ca kosɔbɛ. 36Nga Zanbiri deenw ka bɔ Madaba, bɔra ka na Zan kɛlɛ k'a minɛ, ka taga n'a ka minanw bɛɛ ye. 37Waati dɔ tɛmɛnin kɔ, u y'a fɔ Zonatan n'a baden Simɔn ye ko Zanbiri deenw bena kɔɲɔba dɔ kɛ. U tun bena bɔ Nabata ni kɔɲɔmuso ye k'a bila sira ni jamaba ye. Kanaan mɔgɔbaba dɔ denmuso tun lo. 38Zonatan ni Simɔn tun ma ɲinɛ ko Zanbiri deenw tun y'u baden Zan faga. O la, u yɛlɛla ka taga dogo kuluwo dɔ kɔnɔ. 39K'u to u dogoyɔrɔ la, u ye kɔɲɔcɛ n'a teriw, n'a balimaw natɔ ye, ka na kɔɲɔmuso ka mɔgɔw kunbɛn. U tun be ni dunduntigiw, ni fɔlikɛla dɔ wɛrɛw ye. Kɛlɛkɛminan caaman tun b'u fɛ, ani minan caaman, u tun be nana ni mankanba ye. 40Zonatan nunu bɔra u dogoyɔrɔ la ka girin u kan k'a daminɛ k'u faga. U ye mɔgɔ caaman faga, tɔw bolila ka taga kuluyɔrɔ la. Zuwifuw y'u ka minanw bɛɛ cɛ ka taga n'u ye. 41- A kɛra ten, «kɔɲɔya yɛlɛmana ka kɛ sanga ye, dɔnkiliw yɛlɛmana ka kɛ kasi ye.» 42Zonatan ni Simɔn y'u baden fagako juru sara ka ban tuma min na, u kɔsegira Zurudɛn baji daa la tugu, pɔtɔpɔtɔ yɔrɔ la.

Kɛlɛ min kɛra Zurudɛn baji daa la

43Bakidɛsi ye zuwifuw dogoyɔrɔ lɔn. Lafiɲɛlon dɔ la, a tagara Zurudɛn baji daa la ni kɛlɛden caaman ye. 44O la, Zonatan y'a fɔ a ka mɔgɔw ye ko: «Aw ye wili, an ka kɛlɛ kɛ k'an nii kisi! Bari lonjugu si ma deli k'an sɔrɔ i n'a fɔ bii ta. 45Kɛlɛ b'an ɲafɛ, Zurudɛn baji b'an kɔfɛ, pɔtɔpɔtɔ ni tuu b'an faan dɔ la, boliyɔrɔ te yen. 46O la, sisan aw ka Sankolotigi dali janko an ka se ka kisi an juguw ma.»

47Kɛlɛ daminɛna. Zonatan y'a bolo wili ko a be Bakidɛsi faga, nga ale jɛngɛnna ka bɔ kɔfɛ, a m'a sɔrɔ. 48Zonatan n'a ka mɔgɔw panna ka don Zurudɛn baji la ka jii nɛmu fɔɔ ka taga bɔ baa kɔfɛ. U juguw ma baa tigɛ ka tugu u kɔ. 49Bakidɛsi ka mɔgɔ waa kelen ɲɔgɔn fagara o loon na.

Bakidɛsi be barika sɔrɔ

50Bakidɛsi kɔsegira Zeruzalɛmu. A daminɛna ka Zuda mara dugu dɔw lɔ ka kɛ dugu barikamanw ye. Olu le kɛra: Zeriko yɔrɔ barikaman ye, ni Emayusi, ni Bɛtorɔn, ani Betɛli, ni Tamunata, ni Faratɔn, ani Tefɔn ye. A ye kogojanw lɔ k'u lamini ka koonw don u la, ka sɔgɔnanw kɛ u la. 51A ye kɛlɛden dɔw to dugu nunu kelen kelen bɛɛ kɔnɔ ko u ka to ka Isirayɛlidenw ɲaa gwan. 52A ye barika don Bɛtisuri ni Gazara la, ani Zeruzalɛmu dugu yɔrɔ barikaman na, ka kɛlɛden dɔw to yen, ani dumuni. 53A ye jamana ɲamɔgɔw dencɛw minɛ k'u mara a fɛ, k'u datugu dugu yɔrɔ barikaman na.

54Girɛkiw ka masaya saan 153nan kalo filanan na, Alikime ko u ka Alabatosoba kɔnɔnalu kɔnɔ kogo ci. A tun b'a fɛ ka kiraw ka baara cɛn ten.n U tun daminɛna ka kogo nin ci. 55O waati yɛrɛ la, bana ye Alikime minɛ, baara lɔra. Alikime fari bɛɛ faganin tun lo, a daa minɛn'a la, a ma se ka hali kuma kelen fɔ tugu, walima ka dɔ fɔ a ka soo kosɔn. 56A sara o tile fila nin na tɔɔrɔba la. 57Bakidɛsi y'a mɛn ko Alikime sara tuma min na, a kɔsegira masacɛ Demetiriyusi fɛ. Zuda mara tora hɛrɛ la saan fila kɔnɔ.

Bakidɛsi te se Bɛtibasi kɔrɔ

58Zuwifu Alaɲasiranbaliw bɛɛ ye ɲɔgɔn lajɛn k'a fɔ ɲɔgɔn ye ko: «Zonatan n'a kɔmɔgɔw be hɛrɛ la, u te siranna foyi ɲa. O la, an ka Bakidɛsi wele ka na sisan, a bena se k'u bɛɛ minɛ suu kelen kɔnɔ.» 59U tagara kuma ni Bakidɛsi ye o la. 60Bakidɛsi y'a latigɛ ka sira minɛ ni kɛlɛden caaman ye. A ye batakiw ci a jɛnɲɔgɔnw bɛɛ ma dogo la, minw be Zude mara la, k'a ɲini u fɛ ko u ka Zonatan n'a tɔɲɔgɔnw minɛ. Nga u tun ye min latigɛ, o bɔra kɛnɛ kan, u ma se k'o kɛ. 61Jamana kɔnɔ mɔgɔ minw tun y'o janfa nin latigɛ, Zonatan nunu y'o mɔgɔ bi duuru ɲɔgɔn minɛ k'u faga. 62O kɔ, Zonatan ni Simɔn, n'u kɔmɔgɔw tagara kongokolon kɔnɔ, Bɛtibasi, ka dugu nin tomo lalaga k'a lɔ kura ye ka barika don a la. 63Bakidɛsi y'o mɛn tuma min na, a y'a ka kɛlɛdenw bɛɛ lajɛn, k'a kɔfɛmɔgɔw fana wele ko u ka na ale fɛ Zude mara la. 64A tagara Bɛtibasi ko a b'a datugu. A y'a kɛlɛ tile caaman kɔnɔ, ani ka kɛlɛkɛwotorow dilan. 65Zonatan y'a baden Simɔn to dugu kɔnɔ. A ye mɔgɔ damani minɛ ka bɔ n'u ye ka taga kongo kɔnɔ. 66A ye Odomera n'a balimaw kɛlɛ ka se u kɔrɔ, ka se fazirɔnwo fana kɔrɔ, u ka sigiyɔrɔ la. Olu farala Zonatan n'a ka mɔgɔw kan ka kɛlɛ kɛ, u jɛnna ka taga Bakidɛsi kama. 67O la, Simɔn n'a ka mɔgɔw bɔra Bɛtibasi ka kɛlɛkɛwotoro nunu jɛni. 68U ye Bakidɛsi kɛlɛ, ka se a kɔrɔ kosɔbɛ. A tun y'a latigɛ ko a bena u kɛlɛ cogo min na, o ma ɲa, o digira a la kosɔbɛ. 69Zuwifu Alaɲasiranbali minw tun y'a wele ka na mara nin na, a diminin tun be olu kɔrɔ kosɔbɛ. O la, a y'u caaman faga. O kɔ, a y'a latigɛ ka kɔsegi soo.

70Zonatan y'o mɛn tuma min na, a ye mɔgɔw ci a fɛ ka bɛɛn ɲini n'a ye, ani mɔgɔ minw tun minɛna, k'olu labilako ɲanabɔ. 71A ye fɛɛn min ɲini a fɛ, Bakidɛsi sɔnna o ma. A kalila ko a ben'a to ɲasuma na a sii bɛɛ kɔnɔ. 72A tun ye mɔgɔ minw minɛ Zuda mara la, a y'olu segi a ma, ka sɔrɔ ka kɔsegi a ka jamana na. A ma segi ka na zuwifuw ka mara la tugu. 73Kɛlɛ banna ten Isirayɛli jamana kɔnɔ. Zonatan tagara sigi Makimasi. K'a to o yɔrɔ la, a kɛr'a ka mɔgɔw ɲamɔgɔ ye, ka zuwifu Alaɲasiranbaliw faga k'u tunu ka bɔ Isirayɛli jamana na.

ALA KA KUMA

© 2008 Alliance Biblique du Burkina Faso

More Info | Version Index