Chwilio ffurf

LA-EN LĒVĪ 11

Nup Töṙeūla Tökò-òren Nö Kā-a

1Ngaich ngam Mā Tēv nö vë-ekūö Môsös Āròn inrē, nö ngö ṙô tö cha. 2Vë-ekūö yip kūön Israĕl, ngö ṙô, Në nun tö-aṅ chehen kahāḵ yīö min aṅ i në töṙeūla në më-el ngam tumlat. 3Nup töng hôyu kinsòh röön, tösanāṙu kunröön vamööklö nyā-aṅkūöre nö hachāmö, i në töṙeūla, anū-ö kahāḵ yīö min. 4Në pöri min töt kāḵa tö yīö nö i në vamööklö nyā-aṅkūöre nö hacham, hēk i në töhôyu kunröön: ngòh ūṅt, pò ò nö vööklö nyā-aṅkūöre nö hacham öthôyu kunröön pöri, tökuvīö an anga-aṅ nö in yīö. 5Iskurīl inrē, pò ò nö vööklö nyā-aṅkūöre nö hacham, öthôyu kunröön pöri; tökuvīö an anga-aṅ nö in yīö. 6Ngam hër inrē, pò ò nö vööklö nyā-aṅkūöre nö hacham, öthôyu kunröön pöri; tökuvīö an anga-aṅ nö in yīö. 7Ha-un inrē, pò ò nö hôyu kunröön sanāṙu kunröön inrē hö-ö pöri nö vööklö nyā-aṅkūöre nö hacham; tökuvīö an anga-aṅ nö in yīö. 8Öt kāḵa nup alaha u tö yīö, ötlūölka nup tökapah tö yīö; tökuvīö nun anū-ö nö in yīö.

9Në nun kahāḵ yīö i nup aṅ el mak: öp tö kinvāyu kāḵ tökunlööhöv inrē el mak, el mai, el tahël, anū-ö min kāḵ yīö.

10Nup tötkinvāyu kāḵ ötkunlööhöv inrē el mai, el tahël inrē, ṙòkhöre nup mahalöinyköre el mak, ṙòkhöre el tahël, ṙòkhöre inrē nup tö-aṅ nup më-el mak; sinòkkūö yīö nun anū-ö: 11Tösaòkhu min anū-ö tö yīö; un kāḵa nup alaha u tö yīö, nup tökapah min inrē tösa-òkhu tö yīö. 12Nup töt kinvāyu ötrēhĕn nö kunlööhöv el mak, anū-ö tösa-òkhu tö yīö. 13Në nun inrē tösa-òkhu tö hayöömö inlahen; un kāḵa anū-ö, sin-òkkūö nun: tökiröng matēṙö, òsprē inrē, 14Mahatēṙa, völchör inrē nup mihëṅṙö u; 15Kavöö nup mihëṅṙö u; 16Mingeūkö, hòk hatööm inrē, sakiôk inrē, hòk inrē i mihëṅrö u; 17Kun mingeūkö, kòrmòrön inrē, tökiröng mingeūkö inrē. 18Tösinrōlu mingeūkö, peliken inrē, völchöör inrē; 19Tö nup istôk inrē, heròn i mihëṅṙö u, hupō, tayām inrē.

20Ṙòkhöre nup tö saneôku, töṙeūla töfënö kalröön sin-òkkūö yīö anū-ö 21Në pöri tökāḵa tö yīö i në tösaneôku, töṙeūla töfënö kalröön nup tökalröönu lā tulöng tö kunröönre, nö tinsòku nö i kui tumlat; 22Kāḵa u më-eṅ; ngam hāyö i mihëṅrö ò, öp töngānyö kui hāyö inē i mihëṅrö ò, tatēt inrē i mihëṅṙö ò. 23Ṙòkhöre pöri nup tösaneôku töṙeūla, nup töfënö kalröön, nö tösa-òkhu tö yīö.

24Ngaich kūö u min yī-ö kuvīö: öp lamūölkö nup tökapah in u min kuvīö anga-aṅ söl harap. 25Öp tamyuk öp tökapah in u söich inyutre min anga-aṅ ngaich kuvīö söl harap. 26Nup töṙeūla töhôyu kinsòh röön, rö-ö nö töhôyu kunröön, ötrēhĕn nö vööklö nyā-aṅkūöre nö hacham, tökuvīö nö in yīö: yip lamūölken u kuvīö min. 27Öp ramööntö elröönre nö ṙeul, i në töṙeūla töfënö kalöön, tökuvīö anū-ö nö in yīö: öp lamūölkö öp tökapah kuvīö min anga-aṅ söl harap. 28Öp tamyuk öp tökapah in u söich inyutre min anga-aṅ ngaich kuvīö söl harap: tökuvīö nun anū-ö nö in yīö.

29Në nun inrē tökuvīö nö in yīö i në töṙeūla në lamān el tumlat; vösöl, kumit, tökiröng kav i mihëṅṙö ò, 30Kekkō, ṙēv el tanyô, kav, kav aṅ kuyāyö inrē, kakūöng inrē. 31Anū-ö nun në tökuvīö nö in yīö i në ṙameul: öp lamūölkö u, yē u nö kapah, kuvīö min yī-ö söl harap. 32Öp chūök fūkö u yē u nö kapah, kuvīö min angū-ö; yĕn pòrô nö tökachāvu, hēk hilā, hēk uk, hēk sāk, öp töng sitih chūökṙen, chūök la-en nö kēkaṙen, hòṅ sumtu angū-ö nö el mak, ngaich tökuvīö angū-ö söl harap: ngaich möl min angū-ö nö löök. 33Nup tanīöyö, chūök u nö suktöre, nup töng sitih aṅ u, kuvīö min ngaich likukngö u yī-ö. 34Ṙòkhöre nup nyā-aṅkūö el e, nup tömāku alaha, nö kuvīö min: nup tö-ôkö aṅ nup tö ngatī kuvīö min. 35Nup chūök fūkö u nö kapah kuvīö min; yĕn tisum, yĕn chūök tösūmö, likūki min angū-ö: tökuvīö nun anū-ö, ngaich tökuvīö min nö in yīö. 36Töhet öp löklö mak, hēk öp tö-ulö mak chūök finôkö mak: öp tösūöhtöre pöri nö i nup tökapah alaha u kuvīö min. 37Yē ngam tökapah alaha u nö fuk kui nup taneūich kulöl nup tö hòṅ teūichtu nö ngaich, het angū-ö. 38Yĕn ṙöstu pöri öp mak nö i kui öp kulöl, ngaich fuk in e öp tökapah, kuvīö angū-ö nö in yīö.

39Yĕn töṙeūlavö tökapah, öp tö kāḵa tö yīö; söl harap min nö kunvīö öp lamūölken ò; 40Söich hilāre min anga-aṅ öp kamāḵ ngam tökapah, ngaich kuvīö söl harap: söich hilāre min inrē öp tamyuk ngam tökapah, ngaich kuvīö söl harap.

41Sinòkkūö nun në töṙeūla lamān nö el tumlat; öt tö kāḵa nun anū-ö 42Nup töng lanāntö aichre, nup töfënö kalröön, hēk töṙōlö kalröön, nup töṙeūla lamāna nö el tumlat, anū-ö töt kāḵa tö yīö pò u nö sinòkkūö. 43Uh yin vītöre sinòkkūö i në töṙeūla në lamāna, ui rēhĕn vītöre kuvīö in u, hòṅ yīö öt hamumngöre tö kūö u. 44Tön Chū-ö chin Mā Tēv, Tēv meh: ahetlöre yin lökten, hòṅ yīö töhet; tön töhet Chin Chū-ö: ui rēhĕn hamumngöre öi yô-òv lökten i töreūla nup mahalöinyköre nö el tumlat. 45Tön Chū-ö Chin Mā Tēv kamënyen meh ṙā-ang ap panam Aikup, öich Tēv meh: lökten yin het, tön Töhet Chin Chū-ö.

46Ngih ön chöngö i në töṙeūla, në hayöm inrē, në tö-aṅ inrē mahalöinyköre el mak, nup lamāna inrē el tumlat: 47Inrīkngöre tökuvīö tö tölöök, inrīkngöre nup tö-aṅ tökanāḵen tö nup tö-aṅ töt kanāḵen.

Nicobarese Bible

© 2014 Bible Society of India

More Info | Version Index